kvh

Tilkynning frá KVH

Tue, 05 May 2026 10:10:18 GMT

Tilkynning frá KVH

Kæru viðskiptavinir KVH.

Nú fara að detta inn í heimabankann kröfur fyrir viðskiptum aprílmánaðar ef þær eru ekki komnar til innheimta nú þegar.

Sú breyting hefur orðið á að í stað þess að gjalddagi sé 5.hvers mánaðar og eindagi þann 20. eins og verið hefur þá verður gjalddagi reikninga síðasti dagur úttektarmánaðar og eindagi þann 15. komandi mánaðar.

Ákvörðun þessi var tekinn á stjórnarfundi sem haldinn var þriðjudaginn 21. apríl og tók hún gildi nú í apríl lok. Við vonumst til að þetta valdi engum óþægindum fyrir viðskiptavini okkar, þökkum viðskiptin og hlökkum til að fá að þjónusta ykkur eftir sem áður.

Virðingarfyllst

Fh stjórnar KVH

Þórunn Ýr Elíasdóttir

Kaupfélagsstjóri.

Ný stjórn KVH

Wed, 29 Apr 2026 09:00:41 GMT

Ný stjórn hjá KVH hefur tekið til starfa

Þann 14. apríl síðastliðinn var aðalfundur KVH haldinn í Félagsheimilinu á Hvammstanga. Var vel mætt á fundinn og var gleðilegt að sjá að töluverður fjöldi af áheyrnarfulltrúum mættu á fundinn. Að auki mættu allir kjörnir fulltrúar til fundar sem mér skilst að sé með fyrstu skiptum að það hafi gerst að ekki hafi þurft að boða varafulltrúa á aðalfund sem eru frábærar fréttir fyrir KVH og vonandi það sem koma skal.

Stjórn og starfsmenn fagna því að vel sé mætt á fundi félagsins þar sem þetta er jú sameign okkar allra.

Það varð töluverð breyting á stjórn félagsins og leystu Örn Óli Andrésson og Oddur Sigurðarson þá Þorstein Sigurjónsson og Ársæl Daníelsson af hólmi. Báðir hafa þeir setið í stjórn félagsins til tugi ára og þökkum við þeim hjartanlega fyrir alla þá vinnu og þjónustu sem þeir hafa lagt til starfsins á liðnum árum. Kom fram á aðalfundi að Þorsteinn hefur setið í rúma 4.áratugi og ekki misst af ári á aðalfundum félagsins, sem er viss elja út af fyrir sig.

Örn Óli var áður varamaður í stjórn og sætið hans tók Hermann Geir Karlsson.

Við bjóðum nýja stjórnarmenn innilega velkomna í hópinn og væntum þess að samstarf haldi áfram að vera gott eftir sem áður.

Ný stjórn hefur nú þegar fundað í fyrsta sinn og boðaði sá fundur gott til framtíðar.

Flestir hafa að öllum líkindum tekið eftir nýju útliti heimasíðunnar og er smátt og smátt að bætast við upplýsingarnar sem þar eru að finna. Á heimasíðunni er t.d hægt að skoða ársreikninga KVH undanfarin ár og er sá nýjasti væntanlegur á heimasíðuna á næstu dögum.

Stjórn KVH þakkar fundargestum, starfsmönnum, fulltrúum og síðast en ekki síst kvenfélögunum sem báru fram og sáu um veitingar á deildarfundum og aðalfundi með sínum mikla glæsibrag.

Kærar þakkir fyrir komuna og ykkar framlag til KVH.

Vert er að minnast þess að kvenfélagið Iðja gaf vinnu sína og veitingarnar á deildarfund Hrútafjarðar og miðfjarðardeildar með kærum þökkum fyrir stuðning KVH til þeirra á liðnum árum. Hjartans þakkir Iðju konur fyrir það.

Stjórn KVH hlakkar til komandi tíma með ykkur öllum og vonandi sjáum við sem allra flesta á fundum félagsins að ári komandi.

Nýjustu fréttir frá KVH

Thu, 16 Apr 2026 13:09:48 GMT

Nýjustu fréttir frá KVH

Eins og flestir hafa vonandi tekið eftir eru komnar nýjar innkaupakerrur í verslunardeildir KVH. Gömlu kerrurnar voru komnar vel til ára sinna og búnar að sinna sínu hlutverki vel en voru margar hverjar orðnar ansi lúnar og því löngu komin tími á hvíld fyrir þær. Við vonumst til að nýjar kerrur muni standa sig í langan tíma í þjónustu KVH og að viðskiptavinir okkar verði ánægðir með nýjar kerrur.

Frá lok mars hafa verið haldnir deildarfundir félagsins og aðalfundur félagsins var haldin þriðjudaginn 14. apríl. Mæting á alla fundina var nokkuð góð og gaman var að sjá hversu vel var mætt á aðalfundinn en þó nokkuð margir mættu á þann fund án þess að vera kjörnir fulltrúar á fundinum. Breyting varð á stjórn KVH eftir aðalfundinn og verða færðar frekari fréttir af því á næstu dögum / vikum. Einnig mun ársreikningur félagsins verða aðgengilegur á heimasíðu KVH um svipað leiti.

Stjórn KVH og kaupfélagsstjóri þakka félagsmönnum og öðrum fundargestum kærlega fyrir komuna á fundina og sérstakir þakkir fær starfsfólk KVH sem sá sér fært um að mæta hvort sem það var á deildarfundi eða aðalfund. Og vonumst til að nýjar kerrur falli vel í kramið hjá viðskiptavinum KVH.

Áramótakveðja frá KVH

Wed, 31 Dec 2025 10:03:58 GMT

Árið 2025 í KVH

Á árinu 2025 var haldið áfram að endurnýja eitt og annað í KVH má þar nefna

pappapressu sem vinnur hörðum höndum fyrir kjörbúðina alla daga, var sú gamla

orðin ansi lúin og þurfti þónokkuð miklar strokur til að sinna sínu hlutverki okkur tókst

þó að selja hana uppí hluta að kostnaði á nýrri vél.

Við fjárfestum einnig í nýrri kerru til flutninga á stærri vörum frá okkur þar sem sú

gamla þurfti orðið mikið viðhald á hverju ári til að standast skoðanir bifreiðaeftirlitsins.

Við náðum einnig að selja gömlu kerruna uppí kostnað á þeirri nýju.

Dyttað var að hinu og þessu innandyra sem komið var á tíma. Vinnuaðstöðu og

skipulagi var breytt inná lager kjörbúðarinnar og nánast öll kjörbúðin er orðin rafræn í

hillumiðum, næst á dagskrá í þeim málum er byggingavörudeildin okkar og vonandi

verður hún orðin rafræn snemma á nýja árinu.

Ekki tókust markmiðin okkar um að klára að endurnýja gluggamyndirnar á austurhlið

hússins en hálfnað verk þá hafið er og vonandi tekst okkur að ljúka næsta áfanga á

nýja árinu. Við þökkum SSNV innilega fyrir styrkveitinguna sem þessi hluti fékk frá

þeim en sótt var um í sjóði sóknaráætlunarsjóð SSNV, kærar þakkir!

Ýmislegt liggur fyrir á nýju ári og KVH heldur áfram á blússandi ferð þökk sé

viðskiptavinum okkar sem velja að versla í heimabyggð og nýta sér alla þá þjónustu

sem KVH hefur uppá að bjóða og auðvitað öllum þeim ferðamönnum innlendum sem

erlendum sem leggja leið sína í KVH og láta hróður kaupfélagsins berast manna á

milli.

Starfsfólk KVH þakkar félagsmönnum öllum, viðskiptavinum og samstarfsaðilum,

gleðilegs nýs árs með kærri þökk fyrir árið sem er að líða og okkur hlakkar til að eiga

áframhaldandi gott samstarf með ykkur öllum á nýju ári.

Lifið heil.

F.H. Kaupfélags Vestur Húnvetninga

Þórunn Ýr Elíasdóttir

Kaupfélagsstjóri.

Jólakveðja frá KVH

Tue, 23 Dec 2025 14:11:21 GMT

Jólakveðja frá KVH

Starfsfólk KVH óskar viðskiptavinum sínum öllum gleðilegra jóla og þakkar viðskiptin á aðventunni.

Eins og líklega flestir tóku eftir var bryddað uppá ýmsum nýjungum þennan desembermánuðinn. Aðventudagurinn okkar var þó haldinn í annað sinn og heppnaðist hann með eindæmum vel og þökkum við kærlega fyrir komuna og góðar undirtektir við þeim degi, hann lífgar sannarlega uppá daginn í upphafi aðventu.

Við prufuðum svo að vera með jóladagatal þar sem starfsmenn fengu að velja eina vöru sem færi á afslátt hvern opnunardag í desember. Dregið var úr því vali og lentu þær vörur á þeim degi sem varan var dregin á. Við getum ekki heyrt né séð betur en að fólki hafi fundist þetta skemmtileg viðbót við þjónustu KVH og fóru undirtektir við afsláttarvörum framar okkur björtustu vonum svo hver veit nema jóladagatalið verði árleg viðbót héðan í frá.

Síðast en ekki síst vorum við með 3.kvöldopnanir sem hver hafði sitt þema, ágætis mæting var á öll þessi kvöld og voru undirtektir allavega það góðar að við hugsum framhald á þessu með mögulega aðeins öðrum útfærslum á næsta ári. TAKK fyrir komuna.

Ekki má gleyma föstudagssmakkinu sem var alla föstudaga í desember, það gleður okkur að geta gefið smakk á þeim vörum sem í boði eru í desember og vonandi runnu þær veitingar ljúflega niður og kannski hjálpað einhverjum við val á kræsingum á jólaborðið.

Starfsfólk KVH heldur ánægt inn í jólahátíðina með von um að viðskiptavinir okkar allir séu jafn ánægð með okkur og við með þá.

Gleðileg jól og mættu allir njóta sem allra best.

KVH leggur lið

Thu, 25 Sep 2025 13:03:42 GMT

Það sem af er þessu ári hefur KVH getað stutt við ýmislegt í nærumhverfinu okkar. Húnaþing vestra státar af mjög öflugu og virku félagsstarfi hjá eldri borgurum og var það Kaupfélaginu bæði ljúft og skylt að styrkja þau til kaupa á liðsbúningum sem þau notuðu á Landsmóti UMFÍ 50+ í sumar og á ýmsum íþróttaviðburðum um land allt.

Kvenfélagið Iðja átti 90 ára afmæli og bauð til veglegrar veislu í Ásbyrgi af því tilefni. Gaman var að sjá hversu vel var mætt og mikill metnaður í afmælisveislu félagsins. KVH lét ekki sitt eftir liggja og lagði sitt að mörkum til veislukaffisins.

Menningarfélag Húnaþings fór með hóp frábæra dansara í keppni út fyrir landsteinana í sumar og var það gleðilegt að KVH gat létt undir bagga í stórum útgjaldaliðum sem falla til í svona ferðum.

Eldur í Húnaþingi á sinn fasta sess í styrkveitingum KVH sem og hin ýmsu íþrótta og tómstundafélög á svæðinu okkar. Einnig á æskulýðsstarf kirkjunnar sinn fasta sess í styrktarplönum Kaupfélagsins.

Gærurnar Nytjamarkaður hafa svo notið góðs af tiltekt í KVH og er það fagnaðefni að mikil meðvitund er orðin um að “eins manns rusl er annars manns auður.”

Þetta er aðeins lítið brot af því sem við reynum að gera og létta undir með því sem á sér stað í samfélaginu okkar og ekki má gleyma því að þetta væri ekki hægt ef að KVH ætti ekki sína tryggu viðskiptavini.

Fyrir það erum við svo sannarlega þakklát. Svo lengi sem mögulegt er mun KVH halda áfram að leggja sitt að mörkum til að létta undir og taka þátt í því sem vel er gert í samfélaginu okkar.

Við þökkum viðskiptin, samstarfið og megi KVH lengi lifa.

Góðar gjafir

Wed, 07 May 2025 13:07:37 GMT

KVH hafa borist veglegar og góðar gjafir undanfarnar vikur.

Fyrst ber að nefna veglega og þarfagóða gjöf frá Gærunum. Þær komu færandi hendi og afhentu KVH hjartastuðtæki sem er nú komið upp á vegg og tilbúið til notkunar sem við svo sannarlega vonumst til að þurfa aldrei að nýta en algerlega nauðsynlegt að hafa við höndina ef vá ber að höndum. Gærunum eru færðar sérstaklega góðar og miklar þakkir fyrir þessa góðu gjöf.

Starfsfólk KVH fékk svo girnilega og bragðgóða sendingu frá Kótilettunefndinni og Verslunarminjafélaginu Bardúsu. Þau komu og færðu starfsfólkinu dásamlega bragðgóðar kaffiveitingar með þakklæti fyrir veittan styrk og góða þjónustu. Starfsfólk færir þeim miklar þakkir fyrir veitingarnar og þakklætið.

Svo sannarlega er alveg jafn gott að gefa og þiggja.

Takk fyrir okkur!

Aðalfundur KVH 2025

Tue, 22 Apr 2025 13:08:41 GMT

Aðalfundur KVH var haldinn þriðjudaginn 15. apríl sl.

Dagskrá fundarins var með venjubundnum hætti og var aðsókn með ágætum.

Ársreikningur félagsins fyrir árið 2024 var samþykktur og er hann aðgengilegur hér á síðunni okkar. Hægt er að nálgast hann á þessari slóð:

kvh-arsreikningur-2024-undirr.pdf

Breyting varð á stjórn KVH. Úr stjórn gekk Guðný Helga Björnsdóttir og eru henni færðar þakkir fyrir hennar störf í stjórn KVH undanfarin ár. Í hennar stað kom inn í stjórn Birkir Snær Gunnlaugsson og er hann boðinn velkominn til starfa.

Kaupfélag Vestur Húnvetninga þakkar félagsmönnum fyrir mætingu á deildar-, og aðalfundi félagsins þetta árið og hlakkar til áframhaldandi samstarfs.

f.h stjórnar KVH

Þórunn Ýr Elíasdóttir

Kaupfélagsstjóri

Sendibíllinn merktur

Wed, 19 Feb 2025 11:55:00 GMT

Nú má sjá "nýja" sendibíl KVH vel merktan á rúntinum með varning frá KVH.

Við erum ánægð með útkomuna á þessum merkingum og vonandi fellur hún vel í kramið hjá öllum okkar velunnurum. Einnig er komin "nýr" gluggi á austurhlið KVH sá fyrsti af sex. Næsti gluggi er væntanlegur fyrir páskana og við stefnum á að vera búin að endurnýja alla gluggana í lok sumars eða allra síðasta lagi í haust. Það var reynt að fara eftir sem flestum uppástungum sem fram komu í glugga hugmyndakeppninni og við vonumst til að íbúar verði ánægðir með það sem upp kemur. Endilega lítið eftir nýjum gluggum þegar þið eigið leið um KVH.

Aukakrónur í KVH

Fri, 24 Jan 2025 11:55:58 GMT

Nú geta aukakrónu safnarar Landsbankans, safnað og notað aukakrónur hjá KVH. Samstarfið hófst strax í dag fyrsta opnunardag nýs árs.

Krónurnar sem safnast hjá KVH jafngilda 7% afslætti.

Við vonumst til að þetta veki lukku hjá aukakortshöfum og fögnum samstarfinu við Landsbankann.

Gleðilegt aukakrónu ár.

Árið 2024

Thu, 12 Dec 2024 11:56:47 GMT

Árið 2024 var viðburðarríkt ár hjá KVH.

Kaupfélagsstjóraskipti urðu í byrjun febrúar þegar Björn Líndal lét af störfum og Þórunn Ýr Elíasdóttir tók við.

Í byrjun sumars sagði verslunarstjóri til fjölda margra ára Jenný Duch starfi sínu lausu og kvaddi í lok sumarsins.

Frystirinn undir Sjávarborg var svo endanlega tæmdur og slökkt var á kerfunum sem sinnt hafa sínu hlutverki í rúmlega 100 ár og þjónað fjölda mörgum. Með því lauk sögu frystihólfaleigu KVH.

Í kjölfar þess að kælar KVH sem starfað höfðu hér nánast frá upphafi biluðu var lagt í að kaupa nýja kæliskápa sem nú eru komnir í gagnið en eftir á að klára uppsetningu þeirra að innan og finna út hvernig raðast best í þá o.s.frv.

Farið var á fullt í að koma KVH inn í framtíðina og er búið að fjárfesta í rafrænu hillumiðakerfi sem byrjað er að innleiða og mun sú innleiðing halda áfram næstu daga og mánuði og að ending verður bæði kjörbúð og byggingavörudeild komin með rafræna hillumiða á flest allar sínar vörur. Í þessu felst mikill tímasparnaður, sparnaður á útprentun svo ekki sé minnst á fagurfræðilegt sjónarmið.

Sendibíll KVH (snattarinn) var kominn vel til ára sinna og var viðhalds og viðgerðarkostnaður farinn að verða mikill svo fundinn var nýrri snattari sem er nú farinn að rúnta um götur bæjarins og bíður eftir fallegum KVH merkingum. Einnig var lyftari pakkhússins endurnýjaður enda var hina sömu sögu að segja af þeim gamla og af gamla snattaranum. Það gladdi okkur mjög að geta selt bæði gamla bílinn sem og gamla lyftarann. Allar krónur uppí kostnað eru ávallt vel þegnar.

Ný hjólastólalyfta var tekinn í notkun við Sjávarborg.

Unnið var að nýjum gluggum á Austurhlið hússins og er fyrsti glugginn af sex kominn upp og er ætlunin að því verki verði að fullu lokið í lok sumarsins. Efnt var til hugmyndakynninga innan samfélagsins og gaman var að sjá hversu góð þátttaka var í því verkefni og greinilegt var að hugur fólks um hvað það vill sjá í þessum gluggum var nánast öll á sömu línu og reynum við eftir fremsta megni að bregðast við því.

Hér er stiklað á stóru á því sem gerst hefur í KVH á árinu sem senn er að líða og tökum við fagnandi við nýju ári með öllum þeim áskorunum sem því mun fylgja.

Starfsfólk KVH óskar félagsmönnum öllum, viðskiptavinum sínum og samstarfsaðilum Gleðilegs nýs árs með kærri þökk fyrir árið sem er að líða. Án ykkar væri þetta ekki hægt.

F.H. Kaupfélags Vestur Húnvetninga

Þórunn Ýr Elíasdóttir

Kaupfélagsstjóri.

Frábærar undirtektir vegna gluggamála

Thu, 21 Nov 2024 11:57:38 GMT

KVH þakkar fyrir frábærar undirtektir og hugmyndir vegna glugga á austurhlið hússins.

Það kom svo sannarlega í ljós að fólk hefur skoðun á Kaupfélagshúsinu og útliti þess. Það virtist vera samhljómur þeirra sem tóku þátt í hugmyndatillögum að hafa EKKI auglýsingar í þessum gluggum.

Flestir hölluðust að náttúrumyndum, sögu staðarins og Kaupfélagsins. Ákveðið var að fara þessa leið, blanda saman sögu, menningu og listum, sem gerði okkur kleift að sækja um styrk til SSNV þar sem þetta mun tengjast menningu og sögu staðarins.

Vonandi fæst sá styrkur samþykktur og gluggarnir verði okkur öllum til ánægju, fróðleiks og prýði fyrir húsið sjálft.

Vinna við nýjar gluggamerkingar er þegar komin af stað og standa vonir til að fyrsti "nýi glugginn" nái að líta dagsins ljós fyrir jólin. Ef það næst ekki, þá strax á nýju ári.

Nýir gluggar munu svo bætast við jafnt og þétt og vonandi verður komið nýtt útlit í alla glugga þegar sumarið gengur í garð.

Við þökkum góðar tillögur og enn betri undirtektir.

KVH og verkfærasalan færðu félagsmiðstöðinni Óríon gjöf

Tue, 13 Aug 2024 11:58:07 GMT

KVH og Verfærasalan færðu félagsmiðstöðinni Órion veglegt fótboltaspil að gjöf í júlímánuði.

Vonast er til að gjöfin eigi eftir að koma að góðum notum verða mörgum börnum og unglingum til ánægju og gleði á komandi starfsári.

Til hamingju Órion með flotta fótboltaspilið ykkar og góða skemmtun.

Nautakjöt úr héraði

Thu, 27 Jun 2024 11:58:29 GMT

Kaupfélag Vestur Húnvetninga hefur um árabil boðið viðskiptavinum sínum uppá fjölbreytt úrval af lambakjöti á mjög góðum kjörum enda afurðir heima úr héraði. Einnig höfum við boðið uppá folaldakjöt í ýmsum útfærslum frá Sláturhúsi KVH.

Við erum því stolt af að geta nú boðið uppá nautakjöt heima úr héraði.

Hægt verður að fylgjast með bæði á heimasíðu okkar og á Fésbókinni þegar nautakjötið kemur í sölu en annars munum við að öllu jöfnu reyna að eiga frosið.

Von er á fersku nautakjöti um miðjan júlí en nú þegar eru frosnar nautalundir, sirloin og innralærisvöðvar ásamt ýmsum öðrum steikum komið í sölu og 140gr hamborgarar bætast við eftir helgi. Nautakjötið kemur frá Bæ í Hrútafirði.

Frábærar viðtökur hafa verið við Mumin, Línu og Emil vörunum okkar og er fyrsta sendingin okkar nánast að verða búin en örvæntið ekki því meira nýtt mun bætast við strax eftir helgina.

Við minnum líka á að við erum að bjóða girðingarefni á frábærum verðum og hvetjum alla sem þurfa á slíku að halda að hafa samband við sölumennina okkar.

Við vonumst til að þessar frábæru viðbætur og góðu verð leggist vel í mannskapinn og hlökkum til að sjá ykkur í KVH.

KVH lagði verkefninu "Perlum saman" lið

Fri, 07 Jun 2024 13:57:10 GMT

Föstudaginn 31.maí sl. lagði Kraftur, félag ungs fólks sem greinst hefur með krabbamein og aðstandendur leið sína á Hvammstanga.

Opið hús var í grunnskólanum þar sem fólk kom saman og perlaði armbönd með áletruninni “Lífið er núna” sem er ein helsta fjáröflunarleið Krafts og eru armböndin eingöngu framleidd af sjálfboðaliðum.

KVH lagði til drykkjarföng fyrir áhugasama perlara þennan dag og var gaman að sjá hversu margir lögðu leið sína í skólann til að perla.

KVH sendir baráttukveðjur til Krafts og þakkar fyrir komuna á Hvammstanga.

KVH bauð uppá drykki í 1.maí göngu einstakra barna

Tue, 07 May 2024 13:57:41 GMT

Stjórnendur í félagi Einstakra barna-Stuðningsfélag barna með sjaldgæfa sjúkdóma á Hvammstanga, efndu til göngu 1.maí til að minna fólk á félagið.

Á nokkrum stöðum á landinu koma saman hópar og hlaupa til styrktar Einstökum börnum en á Hvammstanga kom hópur saman í fyrsta skipti að þessu tilefni og rölti hring um staðinn til að minna á félagið.

Hópurinn lagði af stað frá Íþróttamiðstöðinni í blíðskaparveðri og endaði þar líka, á miðri leið var sjálfboðaliði með drykki í boði Kaupfélags Vestur-Húnvetninga.

Stjórnendur eru þakklátir fyrir ljúfa þátttöku og gott veður.

KVH bauð uppá drykkina með heilum hug og heillaóskum til félagsins og allra sem að því standa

Sauðburðardagar KVH fengu góðar undirtektir

Mon, 15 Apr 2024 13:58:07 GMT

Sauðburðardagarnir okkar runnu sitt skeið á mánudaginn og var gaman að sjá hvað þeir fengu góðar undirtektir.

KVH þakkar viðskiptavinum sínum fyrir komuna og vonum að sem allra flestir hafi notið góðs af tilboðunum, hvort sem var í bygg eða kjörbúðinni.

Gallaða timbrið verður áfram á niðursettu verði á meðan birgðir endast. Sauðburðarvörurnar verða svo að sjálfsögðu á sínum stað þó svo að tilboðsdögum sé lokið.

Sjáumst sem oftast í KVH.

Dropp í pakkhúsinu

Thu, 14 Mar 2024 13:58:33 GMT

Frá og með deginum í dag færist afhending dropp sendinga yfir í pakkhúsið frá sjoppunni.

Við vonumst til að þessi breyting á afhendinga stað dropssins muni mælast vel fyrir og minnum á opnunartíma pakkhúsins.

Pakkhúsið er opið 09.00-12.00 og 13.00-18.00 alla virka daga í mars og svo frá og með 02.apríl verður pakkhúsið opið virka daga frá kl. 09.00-18.00

Fyrsti deildarfundur ársins verður svo haldinn í Dæli mánudaginn 18.mars og hefst hann klukkan 20.00 er þetta fundur fyrir Þorkelshólahreppsdeildina en að sjálfsögðu eru allir velkomnir og vonumst við til að sjá sem flesta.

Kaupfélagið.

Frystiklefa sögu KVH lokið

Mon, 04 Mar 2024 13:58:53 GMT

Síðustu vikuna í febrúar bar til tíðinda hjá okkur í KVH. Þá var skrúfað fyrir frostið í fyrsta og síðasta sinn síðan því var hleypt á í frystiklefunum okkar fyrir hartnær 100 árum síðan.

Tekin var ákvörðun snemma á árinu 2023 að ekki borgaði sig að leggja í mikil fjárútlát og viðhald við að viðhalda frostinu þar sem kerfið var orðið gamalt og úrsérgengið.

Okkur telst til að KVH sé með þeim allra síðustu á landsvísu sem hættir að bjóða uppá frystihólf eins og þessi. Þekktust þau þó nánast í hverju þéttbýli hér á árum áður.

Við þökkum leigjendum samstarfið öll þessi ár og bíðum svo spennt eftir að sjá hvernig byggingin mun koma undan löngum frosta vetri.

Að lokum hvetjum við sem allra flesta til að fylgjast með síðunni okkar www.kvh.is. Er ætlunin að vekja hana til lífsins frá og með deginum í dag og setja reglulega inn upplýsingar um starfsemina okkar sem og benda ykkur á það vöruúrval sem fæst í KVH.

Starfsfólk KVH

Nýr kaupfélagsstjóri ráðinn til Kaupfélags Vestur-Húnvetninga (KVH)

Mon, 08 Jan 2024 14:04:37 GMT

Fyrr í haust sagði Björn Líndal Traustason upp störfum sem kaupfélagsstjóri KVH.

Stjórn Kaupfélags Vestur-Húnvetninga hefur ráðið Þórunni Ýr Elíasdóttur í starf kaupfélagsstjóra Kaupfélags Vestur-Húnvetninga.

Þórunn hefur víðtæka reynslu af uppbyggingu og rekstri fyrirtækja og stofnanna og var hún í yfir 30 ár rekstrar og síðar fjármálastjóri hjá heildversluninni Kemis ehf sem var fjölskyldufyrirtæki í eigu foreldra hennar. Einnig átti hún og rak blómaverslun í Breiðholtinu og var svo skrifstofu og fjármálastjóri hjá Samhjálp félagasamtökum.

Undanfarin ár hefur hún sinnt bókhaldsstörfum í ráðhúsi Húnaþings vestra. Þórunn er útskrifuð með diplómu í fjármálum og rekstri frá Háskólanum í Reykjavík. Og á að baki hin ýmsu viðurkenndu námskeið í markaðsmálum, tölvu og tæknimálum. Einnig er hún útskrifuð frá Ráðgjafaskóla Íslands.

“Kaupfélagið stendur frammi fyrir ýmsum breytingum eins og flestir hafa tekið eftir og eins hafa hraði og breytingar í viðskiptalífinu og samfélaginu öllu búið til nýjar áskoranir fyrir tilvist kaupfélagsins sem á sér farsæla sögu frá upphafi síðustu aldar.

Ég tek við starfinu með eftirvæntingu og hlakka til að bætast í starfsmannahóp KVH og takast á við allar þær áskoranir sem starfinu fylgja. Þakklæti fyrir sýnt traust á verkefninu er mér líka ofarlega í huga á þessum tímamótum” segir Þórunn Ýr.

Þórunn mun hefja störf á fyrstu mánuðum nýs árs.

F.h. stjórnar KVH

Gunnar Þórarinsson